MEDRANDO.COM, novo proxecto de Castelo Deporte

Trátase da campaña de captación de socios para 2011. Nunha web sinxela e clara, a asociación preséntase e traza as liñas básicas da súa filosofía e os seus obxectivos fundamentais. Castelo Deporte pretende triplicar o número de socios actuais a finais de ano.

Castelo Deporte lanza a súa campaña de captación de socios para o novo ano. Segundo o solicitado pola directiva na derradeira asemblea do pasado ano, acadar unha cota maior de afiliados é un dos obxectivos da organización para 2011, polo que dende a área de comunicación o primeiro paso en firma xa está dado.

'MEDRANDO.COM' pretende ser unha idea sinxela de asimilar, o lema dunha campaña viral feita para as redes sociais e internet coa que Castelo Deporte quere sensibilizar á mocidade sobre a importancia de estar representada e ter voz para organizarse e facer cousas diferentes. Na web, presentada este xoves pola entidade cullerdense, explícanse as actividades máis coñecidas da asociación, e incídese na importancia do apoio humano, e non tanto económico, para ser cada día máis fortes.

Castelo Deporte pretende distribuir cartaces da campaña 'MEDRANDO.COM' ao longo de todo o ano, e fará da súa imaxe un dos aspectos fundamentais da súa comunicación nas diferentes actividades a desenvolver.